Эрүүл мэндийн тухай хууль

Эрүүл мэндийн тухай хууль

ГУРАВДУГААР БҮЛЭГ ЭМНЭЛГИЙН МЭРГЭЖИЛТНИЙ ЭРХ, ҮҮРЭГ

22 дугаар зүйл. Эмчлэх, сувилах, эм барих үйл ажиллагаа явуулах
22.1.Эрүүл мэндийн асуудал эрхэлсэн төрийн захиргааны төв байгууллагаас мэргэжлийн үйл ажиллагаа эрхлэх зөвшөөрөл авсан их эмч, бага эмч энэ хуулийн 17.1-д заасан эмчлэх үйл ажиллагаа эрхлэнэ.
/Энэ хэсэгт 2001 оны 11 дүгээр сарын 30-ны өдрийн хуулиар нэмэлт, өөрчлөлт орсон/
/Энэ хэсгийг 2007 оны 12 дугаар сарын 21-ний өдрийн хуулиар өөрчлөн найруулсан/
22.2. Сувилахуйн боловсрол эзэмшүүлэх тусгай зөвшөөрөл бүхий сургууль төгсөж, эрүүл мэндийн асуудал эрхэлсэн төрийн захиргааны төв байгууллагаас мэргэжлийн үйл ажиллагаа явуулах зөвшөөрөл авсан сувилагч сувилах үйл ажиллагаа явуулна /Энэ хэсэгт 2001 оны 11 дүгээр сарын 30-ны өдрийн хуулиар нэмэлт, өөрчлөлт орсон ба 2006 оны 01 дүгээр сарын 19-ний өдрийн хуулиар өөрчлөлт орсон/.
22.3. Эм зүйн ухааны боловсрол эзэмшүүлэх тусгай зөвшөөрөл бүхий сургууль төгсөж, эрүүл мэндийн асуудал эрхэлсэн төрийн захиргааны байгууллагаас зөвшөөрөл авсан эм зүйч, эм найруулагч эм барих үйл ажиллагаа явуулна.
/Энэ хэсэгт 2001 оны 11 дүгээр сарын 30-ны өдрийн хуулиар нэмэлт, өөрчлөлт орсон ба 2006 оны 01 дүгээр сарын 19-ний өдрийн хуулиар өөрчлөлт орсон/
/Энэ зүйлд 2008 оны 12 дугаар сарын 19-ний өдрийн хуулиар өөрчлөлт оруулсан/
22.4. /Энэ хэсгийг 2002 оны 4 дүгээр сарын 19-ний өдрийн хуулиар хүчингүй болсонд тооцсон/

23 дугаар зүйл. Эмчлэх, сувилах, эм барих үйл ажиллагаа явуулах зөвшөөрлийг хүчингүй болгох, дахин авах, мэргэжлийн ёс зүйн хэм хэмжээг тогтоох
23.1. Эмчлэх, сувилах, эм барих үйл ажиллагаа явуулах зөвшөөрлийг дараахь тохиолдолд эрүүл мэндийн асуудал эрхэлсэн төрийн захиргааны байгууллагын эрх бүхий албан тушаалтны шийдвэрээр 6 сараас 1 жил 6 сар хүртэл хугацаагаар хүчингүй болгоно:
/Энэ хэсэгт 2008 оны 12 дугаар сарын 19-ний өдрийн хуулиар өөрчлөлт оруулсан/
23.1.1. эмнэлгийн мэргэжлийн ёс зүйн хэм хэмжээг ноцтой зөрчсөн;
23.1.2. мэргэжлийн алдаа гаргаж, хүний амь нас, эрүүл мэндийг хохироосон нь нотлогдсон.
23.2. Энэ хуулийн 23.1.-д заасны дагуу зөвшөөрлийг хүчингүй болгосон тохиолдолд уг хугацаа дууссаны дараа тухайн эмнэлгийн мэргэжилтэн дахин зөвшөөрөл авах асуудлаар эрүүл мэндийн асуудал эрхэлсэн төрийн захиргааны байгууллагад хүсэлтээ гаргаж болно.
/Энэ хэсэгт 2001 оны 11 дүгээр сарын 30-ны өдрийн хуулиар өөрчлөлт орсон/
/Энэ хэсэгт 2008 оны 12 дугаар сарын 19-ний өдрийн хуулиар өөрчлөлт оруулсан/
23.3. Эрүүл мэндийн асуудал эрхэлсэн төрийн захиргааны төв байгууллагын дэргэд Ёс зүйн хороо байгуулан ажиллуулна. Ёс зүйн хорооны дүрэм анагаах ухааны болон эмнэлгийн мэргэжлийн ёс зүйн хэм хэмжээг эрүүл мэндийн асуудал эрхэлсэн Засгийн газрын гишүүн батална /Энэ хэсгийг 2002 оны 4 дүгээр сарын 19-ний өдрийн хуулиар өөрчлөн найруулсан ба 2006 оны 01 дүгээр сарын 19-ний өдрийн хуулиар нэмэлт орсон/.

24 дүгээр зүйл. Хүний их эмчийн тангараг
24.1. Анагаах ухааны дээд боловсрол эзэмшүүлэх тусгай зөвшөөрөл бүхий сургуулийг хүний их эмчийн мэргэжлээр төгссөн хүн бүр:
"Эмч би,
Эмчийн ёс зүй, төрийн хуулийг чандлан сахиж,
Эрдэнэт хүний амь нас, эрүүл мэндийн төлөө
Эрдэм чадал, энэрэх сэтгэлээ харамгүй зориулахаа
тангараглая,
тангараглая,
тангараглая."
гэсэн хүний их эмчийн тангаргийг өргөнө.
/Энэ хэсэгт 2002 оны 4 дүгээр сарын 19-ний өдрийн хуулиар нэмэлт, өөрчлөлт орсон/
24.2. Тангараг өргөх, хүндэтгэл үйлдэх журмыг эрүүл мэндийн асуудал эрхэлсэн Засгийн газрын гишүүн батална /Энэ хэсэгт 2002 оны 4 дүгээр сарын 19-ний өдрийн хуулиар өөрчлөлт орсон/.
24.3. Тангараг өргөсөн хүний их эмч нэрийн тэмдэг хэрэглэнэ.

25 дугаар зүйл. Эмнэлгийн мэргэжилтний эрх
25.1. Эмнэлгийн мэргэжилтэн дор дурдсан эрх эдэлнэ:
25.1.1. мэргэжлийн онцлог асуудлаар аль ч байгууллагын захиргаа, иргэнд шаардлага тавих, зөвлөгөө өгөх;
25.1.2. өвчтөний амь насанд аюултай байдал буй болсон, амаржих зэрэг эмнэлгийн яаралтай тусламж үзүүлэх шаардлагатай тохиолдолд иргэн, байгууллага, аж ахуйн нэгжийн эзэмшлийн тээврийн хэрэгслийг дайчлан ашиглах;
25.1.3. эмнэлгийн мэргэжилтний мэргэжлийн эрх, үүрэгт нь болон өвчтөний амь насанд харш үйлдэл хийлгэхээр шаардсан тохиолдолд түүнийг эмчлэх, үйлчлэхээс татгалзах;
25.1.4. өвчтөний амь насанд аюултай байдал бий болсон тохиолдолд эмч өөрөө үр дүнтэй гэж үзсэн эмчилгээний аргыг сонгон хэрэглэх;
25.1.5. хууль тогтоомжид заасан бусад эрх.
25.2. Эмнэлгийн мэргэжилтний мэргэжлийн онцлогтой холбогдсон тодорхой эрхийг эрүүл мэндийн асуудал эрхэлсэн төрийн захиргааны төв байгууллага тогтоож болно.
25.З. Энэ хуулийн 25.1.2-т заасан эрхийг хэрэгжүүлэхтэй холбогдон гарсан зардлыг түргэн тусламжийн үйлчилгээний тарифаар холбогдох эмнэлгийн байгууллага нөхөн олгоно.

26 дугаар зүйл. Эмнэлгийн мэргэжилтний үүрэг
26.1. Эмнэлгийн мэргэжилтэн нь дор дурдсан үүргийг хүлээнэ:
26.1.1. эмнэлгийн мэргэжлийн ёс зүйн хэм хэмжээг биелүүлж, хүнлэг энэрэнгүй үзлийг эрхэмлэн, мэргэжлээ хүний эрүүл мэндийн эсрэг ашиглахгүй байх;
26.1.2. гэнэтийн өвчин, осол, гэмтлээс амь насанд нь аюул учирсан иргэн, амаржих гэж байгаа эхэд энэ хуулийн 25.1.З-т зааснаас бусад тохиолдолд эмнэлгийн тусламжийг ямар ч нөхцөлд үзүүлэх;
26.1.З. эрүүл мэндийн холбогдолтой хууль тогтоомж, оношлогоо эмчилгээ, урьдчилан сэргийлэх ажлын стандарт, технологи, эмнэлгийн тусламж, үйлчилгээ үзүүлэх удирдамж журам болон эрүүл мэндийн асуудал эрхэлсэн төрийн захиргааны төв байгууллагаас баталсан мэргэжлийн үүргийг чанд биелүүлэх;
/Энэ заалтад 2006 оны 01 дүгээр сарын 19-ний өдрийн хуулиар нэмэлт орсон/
26.1.4. хүн амд эрүүл мэндийн боловсрол олгох, сургалт, сурталчилгаа явуулах, эрүүл аж төрөх ёсыг хэвшүүлэхэд дэмжлэг үзүүлэх;
26.1.5. иргэний эрүүл мэндийн болон байгууллагын нууцыг хадгалах;
26.1.6. өвчин, эмгэг болон өвчтөн, нас барагчийн талаархи хууль тогтоомжоор хориглосноос бусад үнэн зөв мэдээллийг холбогдох байгууллага, иргэн, өвчтөний ар гэрийнхэнд өгөх;
26.1.7. хууль тогтоомжид заасан бусад үүрэг.

261 дугаар зүйл. Эмнэлгийн мэргэжилтний нийгмийн баталгаа /Энэ зүйлийг 2003 оны 11 дүгээр сарын 07-ны өдрийн хуулиар нэмсэн/
261.1.Эмнэлгийн мэргэжилтэн нийгмийн дараахь баталгаагаар хангагдана:
261.1.1.эрүүл мэндийн байгууллагад 25 ба түүнээс дээш жил ажилласан эмнэлгийн мэргэжилтэнд тэтгэвэрт гарахад нь 12 сарын, үүнээс сум, тосгон, сум дундын эмнэлэгт 10 ба түүнээс дээш жил ажилласан эмнэлгийн мэргэжилтэнд 18 сарын үндсэн цалинтай тэнцэх хэмжээний мөнгөн тусламжийг ажиллаж байгаа эрүүл мэндийн байгууллагаас нь нэг удаа олгох;
261.1.2.орон нутгийн хурал, захиргааны байгууллага, аж ахуйн нэгж, байгууллага, эмнэлгийн мэргэжилтэнд нэмэгдэл цалин, урамшил олгох, дэмжлэг үзүүлэх;
261.1.3. сум, тосгон, сум дундын эмнэлэгт 3-аас дээш жил тогтвортой, үр бүтээлтэй ажиллаж байгаа эмнэлгийн мэргэжилтнийг төрийн зардлаар төгсөлтийн дараахь мэргэшүүлэх сургалтад хамруулах, их эмч, бага эмч, сувилагчид 5 жил тутамд нэг удаа 6 сарын үндсэн цалинтай тэнцэх хэмжээний мөнгөн тусламжийг ажиллаж байгаа эрүүл мэндийн байгууллагаас олгох;
/Энэ заалтыг 2006 оны 01 дүгээр сарын 19-ний өдрийн хуулиар нэмсэн/
/Энэ заалтад 2007 оны 11 дүгээр сарын 30-ны өдрийн хуулиар өөрчлөлт орсон/
261.1.4.хуульд заасан бусад баталгаа.
261.2.Энэ хуулийн 261.1.1-д заасан тусламж олгох журам, уг тусламжид хамрагдах эмнэлгийн мэргэжилтний жагсаалтыг эрүүл мэндийн болон санхүүгийн асуудал эрхэлсэн Засгийн газрын гишүүд хамтран батална /Энэ хэсгийг 2006 оны 01 дүгээр сарын 19-ний өдрийн хуулиар нэмсэн/.

27 дугаар зүйл. Эрүүл мэндийн ажилтанд олгох нэмэгдэл цалин хөлс, нөхөн төлбөр
27.1. Олон улсын хөл хориот өвчний голомтод болон байгалийн гамшиг, осол, бусад онцгой тохиолдолд гэнэтийн дайчилгаагаар ажилласан эрүүл мэндийн ажилтанд цалин хөлсийг нь З дахин нэмэгдүүлж, дайчилгааг зохион байгуулсан газраас голомт цомхотгосноос хойш 1 сарын дотор олгоно /Энэ хэсэгт 2002 оны 4 дүгээр сарын 19-ний өдрийн хуулиар нэмэлт, өөрчлөлт орсон/.
27.2. Эрүүл мэндийн ажилтан олон улсын хөл хориот өвчний голомтод ажиллаж халдвар авсны улмаас болон өвчтөнд эмнэлгийн яаралтай тусламж үзүүлэх үүргээ гүйцэтгэх үедээ гадны шалтгаанаар амь насаа алдвал ар гэрт нь түүний 3 жилийн цалин хөлстэй тэнцэх хэмжээний нөхөн төлбөрийг 1 удаа, хөдөлмөрийн чадвараа түр алдах буюу тахир дутуугийн зэрэг тогтоогдвол тэтгэмж, урьд авч байсан цалин хөлсний зөрүүг тэтгэмж авч байгаа хугацаанд ажил олгогч олгоно /Энэ хэсэгт 2002 оны 4 дүгээр сарын 19-ний өдрийн хуулиар өөрчлөлт орсон/.
27.3. Олон улсын хөл хориот өвчний голомтод болон эмнэлгийн яаралтай тусламж үзүүлэх ажилд дайчлагдан ажилласан иргэн энэ хуулийн 27.2.-т заасан заалтад нэг адил хамаарна /Энэ хэсэгт 2002 оны 4 дүгээр сарын 19-ний өдрийн хуулиар өөрчлөлт орсон/.
27.4. Энэ хуулийн 27.3-т заасан иргэн тогтмол ажил эрхэлдэггүй бол цалин хөлсийг хөдөлмөрийн хөлсний доод хэмжээгээр тооцно.
Дэлгэрэнгүй...

Стресс өвчин мөн үү?

Стресс буюу сэтгэлийн дарамт гэдэг нь аливаа хүн өөрийн хүссэн бөгөөд үр дүн нь тодорхой бус боловч боломж байдал шахалт шаардлагатай тулгарсан эрчимтэй орох явдал юм.

а/ Үргэлж
б/ Ихэнх тохиолдолд
в/ Заримдаа
г/ Хэзээ ч үгүй гэсэн туршаад үзээрэй.

1. Ямарваа үйл явдалгүй хэвийн байдал танд уйтгартай санагддаг уу?
а-4 б-3 в-2 г-1

2. Их ажил, төлөвлөгөөтэй байх үедээ та сэтгэл хангалуун байдаг уу?
а-4 б-3 в-2 г-1

3. Их ачаалалтай үед танд ажиллахад амар байх уу?
а-4 б-3 в-2 г-1

4. Хамт ажиллагсад тал талаас чинь давшлахад тэсвэр алдардаг уу?
а-1 б-2 в-3 г-4

5. Хамт ажиллагсдынхаа шахалтыг мэдрэн, яаравчлан ажиллах нь танд таалагдахгүй юу?
а-1 б-2 в-3 г-4

6. Танд хэвшсэн хэмнэлтэй ажил таатай санагддаг уу?
а-4 б-3 в-2 г-1
7. Ээлжит ажлаа дуусмагцаа л та өөр ажил хайж эхэлдэг үү?
а-4 б-3 в-2 г-1

8. Та байнгын ажлыг эрхэмд үзэж, өөрийн хийх үйлдлээ урьдчилан боддог уу?
а-4 б-3 в-2 г-1

9. Цаг хугацаа шахуу, бүх төлөвлөгөө алдагдах үед та идэвхтэй, үр дүнтэй ажиллаж чаддаг уу?
а-4 б-3 в-2 г-1

10. Хүчтэй өрсөлдөгчтэй үед таны оюуны болон биеийн хүч илт нэмэгддэг үү?
а-4 б-3 в-2 г-1

11. Танд ээлжийн амралт тань тайван өнгөрвөл уйтгартай юу?
а-4 б-3 в-2 г-1

12. Та /мелодрам/-аас илүүтэй зодоон цохион, аймшгийн кино үзэхийг эрхэмлэдэг үү?
а-4 б-3 в-2 г-1

13. Та аз турших дуртай юу?
а-4 б-3 в-2 г-1

14. Та бэрхшээлтэй тулгармагцаа бууж өгдөг үү?
а-1 б-2 в-3 г-4

15. Идэвхгүй байдал болон хий хоосон өнгөрөөсөн цаг хугацаа чинь тэсгэл алдуулдаг уу?
а-4 б-3 в-2 г-1

16. Та орой босч, хөвсгөр буйданд шигдэн өдрийг өнгөрөөх дуртай юу?
а-4 б-3 в-2 г-1

17. Та биеийн хүчний ажлын дараа хэвийн байдалдаа амархан эргэж ордог уу?
а-4 б-3 в-2 г-1

18. Та зорилгодоо шууд дайран хүрдэг хүмүүсийн тоонд багтах уу?
а-4 б-3 в-2 г-1

19. Таныг /хуваарьт/ амьдрал тэсгэл алдуулдаг уу?
а-4 б-3 в-2 г-1

20. Та үйл явдлын халуун цөмд орохыг хүсдэг. Таны эргэн тойрны хүмүүсийн чинь эргэлт хөрвөлт таалагддаг уу?
а-4 б-3 в-2 г-1

Оноогоо тоолоод үзье.
20 оноо:
Та хэвийн ажиллахын тулд заавал цочролд орох албагүй

21-40 оноо:
Зөвхөн хааяахан цаг цагт танд цочрол зайлшгүй хэрэгтэй юм байна

41-60 оноо:
Бага хэмжээний цочрол танд үргэлжид хэрэгтэй

61-70 оноо:
Таны хувьд цочрол бол амьдрал бөгөөд танд /стресс/ тун хэрэгтэй.


Дэлгэрэнгүй...

Холестерол гэж юу вэ?

Холестерол нь өөх тосыг бүрдүүлдэг үндсэн хэсгүүдийн нэг юм. Хэдийгээр бие махбодид холестерол хэрэгтэй байдаг боловч цусан дахь хэмжээ хэт ихсэх нь цусны урсгалд саад учруулдаг.

Цусан дахь холестеролын хэмжээ ихсэх нь судас хатуурахын гол шалтгаан болдог.

Ингэснээр судасны бөглөрөл үүсч эд эрхтэнд очих цусан хангамжийн дутагдлыг үүсгэдэг. Цусан дахь холестеролын хэмжээ ихсэхэд ихэнх тохиолдолд ямар нэг зовиур илэрдэггүй бөгөөд зөвхөн лабораторын шинжилгээгээр илрүүлэх боломжтой.

Хүний биед холестерол үүсэх шалтгаан юу вэ
Ханасан өөх тосоор баялаг хүнсний бүтээгдэхүүн ихээр хэрэглэх нь холестерол үүсэх үндсэн шалтгаан болдог. Тослог ихтэй сүү, өрөм, хайлмаг, бяслаг, өөхтэй мах, цөцгийн тос, өндөгний шар, дотор мах, тосонд хайрсан хоол, нарийн боов, амьтны гаралтай өөх тосонд ханасан өөх ихээр агуулагддаг. Ханасан өөх тосны хажууд ханаагүй агуулсан хүнсийг хэрэглэвэл цусан дахь холестеролыг бууруулж чадна.

Ханаагүй өөх тостой хүнсний бүтээгдэхүүнд оливын тос, ургамлын тос, маргарин, загас, самар зэргийг нэрлэж болно. Түүнчлэн холестеролын хэмжээ ихсэхэд удамшлын хүчин зүйл нөлөөтэй байдаг. Эдгээр хүмүүст хоолны хэв маягаас үл хамааран холестеролын хэмжээ өндөр байдаг.

Хэрэв та ханасан өөх тос багатай, эрүүл хоол хүнсийг хэрэглэж заншвал цусан дахь холестеролыг хэвийн хэмжээнд барьж чадна. Зарим хүмүүс холестерол бууруулах эмийг зайлшгүй хэрэглэх шаардлага гардаг.

Цусан дахь холестеролын хэмжээг хэвийн байлгахын тулд яах ёстой вэ
-Өөхгүй махыг сонгож долоо хоногт 2-оос доошгүй удаа загас хэрэглэх
-Махны өөхийг, тахианы гадар арьс хальсыг цэвэрлэж хэрэглэх
-Тосыг нь ялгаж авсан цагаан идээ, тухайлбал тараг, аарц, ааруул хэрэглэх
-Ургамлын болон оливын тос хэрэглэх
-Нарийн боов, жигнэмэг бялуу, хиам, зайдас, мөхөөлдөс хэрэглэхгүй байх
-Шарсан болон хайрсан хоол хэрэглэхээс татгалзах
-Жимс жимсгэнэ, самар, хүнсний ногоо, үр тарианы бүтээгдэхүүн өргөн хэрэглэх


Дэлгэрэнгүй...

Хараагаа сайжруулах аргууд

Нүд бол хүний сэтгэлийн толь гэдэг. Нүд нь маш эмзэг мэдрэхүйн ямар нэгэн нян вирусээр халдварлагдсан тохиолдолд дотоод бүтэц нь гэмтэхдээ амархан. Тиймээс зөвхөн хоол хүнсэндээ А витамин хэрэглэх төдийгүй нүдээ хамгаалж байх тусгай дасгал хийж байх нь тустай.


Харааны чадвараа хамгаалах арга:

Нэг. Хараагаа жилд нэг удаа шалгуулж бай.

Хоёр. Хэрэв таны холын хараа -4 -өөс дээш муудвал мэргэжлийн нүдний эмчид үзүүлж таарч тохирсон шил, линз зүүж байх хэрэгтэй.

Гурав. Чихрийн шижин өвчнөөс сэргийл. Энэ нь нүдний хараа муудахад шууд нөлөөлдөг.

Дөрөв. Нүдэндээ гэнэтийн ямар нэгэн өөрчлөлт, хараа муудах шинж тэмдэг илэрч буй эсэхэд байнга анхаарал тавьж бай.

Тав. Нарны хэт ягаан туяанаас хамгаалж нарны шил зүүж байх хэрэгтэй.

Харааны чадвараа сайжруулах арга:

Нэг. Ямар нэгэн хөдөлгөөнтэй зүйлийг толгойгоо хөдөлгөн дагуулан харж бай.

Хоёр. Найзуудтайгаа тоо юмуу үсгээр дугаарласан бөмбөгийг барьж тоглох.

Гурав. Хамгийн гол нь бөмбөгөн дээр байгаа тоо юм уу үсгийг заавал харж хэлээрэй.

Дөрөв. Нүдээ зөөлөн аниад аниастай чигээрээ нүдээ 4 зүгт эргүүлэх дасгал хий.

Тав. Өөртөө хамгийн ойр байгаа нэг цэгийг хэдэн секунд хараад тэр чигт байгаа хамгийн алсын цэгийг мөн хэдэн секунд харах дасгалыг тогтмол хий.


Дэлгэрэнгүй...

Өөрийгөө оношлох сорил

Энэхүү текст нь таныг нүдний хуурайшилттай эсэхийг тодорхойлоход тусална.

1. Таны нүд тавгүйтэж дараах шинж тэмдэг илэрдэг үү?
Улайх
Хуурайших
Загатнах
Зовхи хүндрэх
Зовхины ирмэг үрэвсэх
Нүд торох
Тийм, Үгүй

2. Дээрх шинж тэмдэг сүүлийн үед ихэсч байна уу?
Тийм, Үгүй

3. Та удаан хугацаагаар компьютер дээр ажилладаг уу?
Тийм, Үгүй

4. Таны нүд тамхины утаатай орчин, агааржуулагчтай орчинд мэдрэмтгий байдаг уу?
Тийм, Үгүй

5. Дараах эмнүүдээс та тогтмол хэрэглэдэг үү?
Нойрны эм
Шээс хөөх
Харшлын
Тайвшруулах
Жирэмслэлтээс хамгаалах
Даралт бууруулах эм
Тийм, Үгүй

6. Та чихрийн шижин, салстын хуурайшилт, эсвэл бамбай булчирхайн эмгэгтэй юу? Тийм, Үгүй

Сорилын хариу
Хэрэв та 2-оос цөөн "тийм" гэж хариулсан бол баяр хүргэе. Танд нүдний хуурайшилт үгүй аж.
Харин 2 удаа "тийм" гэж хариулсан бол нүдний эмчид заавал үзүүлээрэй.
Хэрэв 2-оос дээш "тийм" гэж хариулсан бол нүдний эмчид яаралтай хандаж оношлогоо, эмчилгээ хийлгээрэй.


Дэлгэрэнгүй...